Niger xuntasi yetakchisi prezident sifatida qasamyod qildi

Nigerda 2023 yili hokimiyatni egallab olgan harbiylar yetakchisi Abdurahmon Tchiani 26 mart kuni mamlakat prezidenti sifatida qasamyod keltirdi. U konstitutsiya o‘rnini egallagan yangi xartiyaga muvofiq besh yillik o‘tish davrida mamlakatni boshqaradi.

Shuningdek, Tchianiga armiya generali — mamlakatdagi eng oliy harbiy unvon ham topshirilgan. Associated Press’ning yozishicha, yangi prezident 2030 yilgacha, ya’ni o‘tish davri oxiriga qadar hokimiyat tepasida qoladi.

Nashrga ko‘ra, avvaliga davlat to‘ntarishidan keyin o‘tish davrini uch yil etib belgilash taklif qilingan, ammo G‘arbiy Afrika davlatlari iqtisodiy hamjamiyati (ECOWAS) ushbu taklifni rad etib, buni provokatsiya sifatida baholagan. Shundan keyin Niger Mali va Burkina-Faso bilan birga ECOWAS’ning keskin sanksiyalariga norozilik ramzi sifatida hamjamiyat tarkibidan chiqqan.

2023 yil 26 iyul kuni Niger prezident gvardiyasi qo‘mondoni general Tchiani boshchiligidagi zobitlar guruhi demokratik yo‘l bilan saylangan prezident Muhammad Bazumni ag‘darib, konstitutsiyaning amal qilishini to‘xtatib, mamlakatning barcha konstitutsiyaviy hokimiyatlarini tarqatib yuborgandi. Tchiani o‘zini Nigerning yangi rahbari deb e’lon qilgan.

Shundan keyin tergov Bazum hamda uning «mahalliy va xorijiy sheriklarini» «vatanga xiyonat qilgani, vakolatli milliy va xalqaro organlar oldida Niger ichki va tashqi xavfsizligiga putur yetkazgani uchun» javobgarlikka tortish uchun yetarli dalillar to‘plashga muvaffaq bo‘lgani ma’lum qilingan edi.