Buxoro neft zavodi jarimaga tortilgan. Raqobat qo‘mitasi tafsilotlarni ochiqlamadi

Raqobat qo‘mitasi 2024 yildagi birja monitoringi natijalari haqida axborot berdi.

Ma’lum qilinishicha, qo‘mita tomonidan o‘tgan yili 165 ta holatda birja savdolariga oid qonunchilik talablari buzilgani bo‘yicha 156 ta xo‘jalik yurituvchi sub’yektga nisbatan ish qo‘zg‘atilgan.

Jumladan, 55 ta holatda xo‘jalik yurituvchi sub’yektlar tomonidan narxlar sun’iy oshirilishi bilan bog‘liq manipulyatsiya harakatlari sodir etilgani va buning natijasida 77,7 mlrd so‘m mablag‘ asossiz olingani aniqlanib, bu mablag‘larni qaytarish yuzasidan ko‘rsatmalar berilgan.

Shuningdek, 94 ta xo‘jalik yurituvchi sub’yektga “Raqobat to‘g‘risida”gi qonunga asosan moliyaviy jarimalar qo‘llangan.

Qo‘mita o‘z axborotida uchta korxonani misol qilib keltirgan:

• Toshkent viloyatida faoliyat yuritayotgan “Bekobodsement” AJ yuqori likvidli va (yoki) monopol turdagi sement mahsulotini birja savdolariga qo‘ymasdan, to‘g‘ridan to‘g‘ri shartnomalar orqali sotgan. Natijada, “Raqobat to‘g‘risida”gi qonunning 29-moddasi talablari buzilib, asossiz daromad olingan.
• “Buxoro neftni qayta ishlash zavodi” MChJ tomonidan ham manipulyatsiya harakatlari amalga oshirilib, asossiz daromad olingan.
• Toshkent shahrida faoliyat yuritayotgan “GTL Gaz” MChJ ham manipulyatsiya holatlarini sodir etib, asossiz daromad olgani aniqlangan.

“Yuqoridagilarga ko‘ra, barcha xo‘jalik yurituvchi sub’yektlarga nisbatan moliyaviy jarimalar qo‘llanildi”, – deyiladi xabarda.

Kun.uz Raqobat qo‘mitasi axborot xizmatidan Buxoro neftni qayta ishlash zavodi va GTL Gaz aynan qaysi mahsulotlar sotuvida manipulyatsiya qilib, qancha miqdorda asossiz daromad olgani va buning uchun ular qancha miqdorda jarimaga tortilgani haqida so‘radi.

Matbuot xizmatiga ko‘ra, qo‘mita mutaxassislari “to‘liq tafsilotlarni e’lon qilish maqsadga muvofiq emas” deb javob bergan.

“Chunki tadbirkorlik sub’yektlari qo‘mitadan o‘z faoliyatlari yuzasidan ko‘rib chiqilgan ishlarning ochiqlanmasligi va OAVda e’lon qilinmasligini so‘rashlari mumkin, bu taqiqlanmagan”, – deyiladi Raqobat qo‘mitasi javobida.

Ma’lumot uchun, “Raqobat to‘g‘risida”gi qonunga ko‘ra, raqobat to‘g‘risidagi qonunchilik talablarining savdolarga oid qismini buzganlik uchun savdolar predmeti boshlang‘ich narxining 3 foizi miqdorida jarima qo‘llanadi.

• Buxoro neftni qayta ishlash zavodi – “O‘zbekneftgaz”ga qarashli, O‘zbekistondagi eng yirik neft zavodi. Ichki bozorni benzin va dizel kabi neft mahsulotlari bilan ta’minlashda muhim o‘rin tutadi.
• “GTL Gaz” MChJ 2024 yil 24 iyunda ro‘yxatga olingan. Yoqilg‘i savdosi bilan shug‘ullanadi. Ustav fondi – 1 mln so‘m. Yagona ta’sischisi va rahbari sifatida Akbarov Mirtura Mirshavkatovich ko‘rsatilgan.