O‘zbekistonda benzin narxi Markaziy Osiyoda eng yuqori ekani ma’lum bo‘ldi

O‘zbekistonda AI-95 benzini narxi Markaziy Osiyo mamlakatlari orasida eng yuqorilardan biri bo‘lib qolmoqda, garchi jahon miqyosida bu ko‘rsatkich o‘rtacha darajadan past bo‘lsa-da. GlobalPetrolPrices ma’lumotlariga ko‘ra, respublikada 1 litr benzin Qozog‘iston, Qirg‘iziston, Rossiya, Belarus va Ozarboyjondagidan qimmatroq turadi.

2026 yil 6 iyul holatiga ko‘ra, O‘zbekistonda 1 litr benzinning o‘rtacha narxi 1,342 dollarni tashkil qiladi. Shu bilan birga, jahon bo‘yicha o‘rtacha narx bir litr uchun qariyb 1,46 dollarni tashkil etadi. Shu sababli O‘zbekistondagi ko‘rsatkich hozircha global o‘rtacha darajadan past, biroq MDH va Markaziy Osiyoning ko‘plab mamlakatlarinikidan ancha yuqori.

Qo‘shni davlatlar bilan solishtirganda, O‘zbekiston avtomobil yoqilg‘isi narxi bo‘yicha mintaqadagi eng qimmat mamlakatlardan biri bo‘lib qolmoqda. Taqqoslash uchun: Turkmanistonda 1 litr benzin narxi 0,43 dollarga to‘g‘ri keladi — bu dunyodagi eng past ko‘rsatkichlardan biridir. Ozarboyjonda — 0,676 dollar, Qozog‘istonda — 0,687 dollar, Rossiyada — 0,940 dollar, Qirg‘izistonda — 1,016 dollarni tashkil etadi. MDH hududida benzini eng hamyonbop davlatlar qatoriga kiruvchi Belarusda ham yoqilg‘i narxi arzonroq (0,942 dollar).

Benzinning eng arzon narxlari bir qator mamlakatlarda qayd etilgan bo‘lib, ularda 1 litr yoqilg‘i jahondagi o‘rtacha narxdan bir necha baravar arzon. Liviyada 1 litr yoqilg‘i narxi taxminan 0,02 dollarni tashkil etadi va bu uni yoqilg‘i arzonligi bo‘yicha mutlaq yetakchiga aylantiradi. Shuningdek, Eronda bu ko‘rsatkich 0,03 dollarni, Venesuelada taxminan 0,04 dollardir.

Benzinning eng yuqori narxi Hongkongda qayd etilgan - 4,06 dollar. Shuningdek, Malavi (3,23 dollar) va Daniya (2,60 dollar) ham benzin narxi eng qimmat davlatlar uchligiga kiradi.