Putin bahorgi harbiy xizmatga chaqirishga oid farmonni imzoladi. Armiyaga 160 ming kishi olib ketiladi

Vladimir Putin bahorgi muddatli harbiy xizmatga chaqiruv to‘g‘risidagi farmonni imzoladi. Unga ko‘ra, Rossiya fuqarolari 1 apreldan 15 iyulga qadar harbiy xizmatga olib ketiladi.

Huquqiy axborot portalida e’lon qilingan hujjatda qayd etilishicha, armiyaga 160 ming kishi chaqiriladi.

2024 yildan boshlab yangi qonunlarga muvofiq, muddatli harbiy xizmatga 18 yoshdan 30 yoshgacha bo‘lgan fuqarolar chaqiriladi.

O‘tgan yil bahorgi chaqiruv mavsumida armiyaga 150 ming kishi, 2023 yilda — 147 ming kishi, 2022 yilda 134,5 ming kishi chaqirilgan edi.

Muddatli harbiy xizmatchilar sonining ko‘payishi Putinning Rossiya armiyasi sonini bosqichma-bosqich oshirish to‘g‘risidagi farmonlari bilan bog‘liq. 2022 yil boshida Rossiyada millionga yaqin harbiy xizmatchi bor edi. Keyingi uch yil davomida armiyadagi shtatlar soni 1,5 millionga qadar oshirilgan.

Avvalroq Ukrainadagi urushda halok bo‘lgan rossiyalik askarlarning soni 100 mingdan oshgani to‘g‘risida xabar berilgandi. Xabarga ko‘ra, eng ko‘p qurbonlar Boshqirdiston (4487), Tatariston (4371), Yekaterinburg (3446), Kuban (3065) va Chelyabinsk (3005)dan bo‘lgan.