ОАВ Украинада 100 минг россиялик аскар ҳалок бўлганини тасдиқлади 

Украинадаги урушда ҳалок бўлган россиялик аскарларнинг сони 100 мингдан ошди. Буни Британиянинг ВВС медиа компаниясининг рус хизмати, "Медиазона" ва кўнгиллилар жамоаси тузган ҳамда 28 март, жума куни янгиланган рўйхатлар кўрсатмоқда. 

Журналистларнинг сўзларига кўра, нашрдан сўнг «фақат битта аниқ уйдирма некролог» топилган. Шу билан бирга, яна 10 269 та некролог текширилмоқда.

2022 йилнинг 24 февралидан 2025 йилнинг 25 мартигача камида 100 001 ҳарбий ҳалок бўлганлиги тасдиқланган.

Хабарга кўра, энг кўп қурбонлар Бошқирдистон (4487), Татаристон (4371), Екатеринбург (3446), Кубан (3065) ва Челябинск (3005)дан бўлган.

Журналистлар: Кўнгиллилар энг катта йўқотишларга дучор бўлмоқда 

2022 йил ёз бошидан то кузнинг ўрталаригача кўнгиллилар энг катта йўқотишларга учради, дея таъкидлайди журналистлар. Уларнинг маълумотларига кўра, 2022 йил охири ва кейинги йил бошига келиб, "Вагнер" гуруҳи томонидан ёлланган маҳбуслар орасида йўқотишлар сезиларли даражада ошган, улар Бахмут яқинидаги Украина позицияларига ҳужум қилиш учун «ҳужумкор гуруҳлар»ни яратиш учун фойдаланилган.

2024 йил сентябрига келиб кўнгиллилар яна ҳалок бўлганлар орасида энг катта тоифага айланди, дейди таҳлилчилар. 28 мартгача Россия армияси ва бошқа хавфсизлик кучларининг 4800 дан ортиқ зобити ҳалок бўлгани тасдиқланди, деб ёзади "Медиазона".

Журналистлар оммавий ахборот воситаларидаги некролог, яқинларнинг ижтимоий тармоқлардаги постлари, маҳаллий расмийлар ва бошқа манбалардан олинган хабарларни ўлимнинг тасдиғи деб ҳисоблайди. Аввалроқ "Медуза" ВВС, "Медиазона" ва кўнгиллилар ўз рўйхатига бошқа давлат фуқароларини киритмагани, шунинг учун уларнинг тадқиқотлари «ДХР» ва «ЛХР» деб аталувчи ҳудудлардан бўлган ҳарбий хизматчилар, шунингдек, Украинада Россия Федерацияси томонида жанг қилаётган Шимолий Корея аскарлари ва бошқа хорижий ёлланма аскарларни қамраб олмаганини таъкидлаган эди.