Turkiyada shvetsiyalik jurnalist terrorchilik ishi bo‘yicha hibsga olindi

Turkiya hukumati shved jurnalisti Yoakim Medinga qarshi ayblovni ilgari surdi, u shu haftaning boshida mamlakatga Istanbul meri Akrom Imomo‘g‘li qamoqqa olinganidan keyin boshlangan umummilliy norozilik namoyishlarini yoritish uchun kelganida qo‘lga olingandi. Shvetsiyaning Dagens ETC gazetasi muxbiri Medin «qurolli terrorchilik tashkilotida ishtirok etish» va «prezidentni haqorat qilish»da ayblanib hibsga olindi, deb xabar qildi prezident Rajab Toyyib Erdo‘g‘anning idorasi 30 mart, yakshanba kuni.

Medin 27 mart kuni Istanbul aeroportida qo‘lga olingan va ertasi kuni qamoqqa joylashtirilgan. Turkiya prezidenti ma’muriyati qoshidagi dezinformatsiyaga qarshi kurash markazi bayonotida aytilishicha, Medin go‘yoki «aksilturk yangiliklari va Kurdiston ishchilar partiyasi terrorchilik tashkilotiga yaqinligi bilan tanilgan». Uni hibsga olish to‘g‘risidagi qaror jurnalistik faoliyati bilan bog‘liq emas, deya ta’kidladi departament.

Turkiya rasmiylariga ko‘ra, Medin matbuot va Turkiyada taqiqlangan Kurdiston ishchilar partiyasi o‘rtasida aloqa o‘rnatgan. Bundan tashqari, jurnalist 2023 yil 11 yanvar kuni Stokholmda Kurdiston ishchilar partiyasi tarafdorlarining mitingida ishtirok etgan 15 nafar gumonlanuvchi orasida. Xabar qilinishicha, uning ishtirokchilari Erdo‘g‘anning manekenini ko‘tarib, uning «osilishi»ni sahnalashtirgan.