Livan Isroil bilan chegaraga 4,5 ming harbiy xizmatchisini joylashtiradi

Livan prezidenti Jozef Aun mamlakat hukumati Isroil bilan chegaraga 4,5 ming harbiy xizmatchi joylashtirishini ma’lum qildi. Aunning so‘zlariga ko‘ra, bu Livan janubiy qismida nazorat o‘rnatish uchun kerak.

Prezidentning qo‘shimcha qilishicha, mamlakatning ayrim hududlarida Isroil armiyasi borligi hukumat uchun vaziyatni juda qiyinlashtirmoqda. U Qo‘shma Shtatlarni Tel-Aviv o‘z qurolli kuchlarini Livan hududidan olib chiqib ketish uchun bosim o‘tkazishga chaqirdi.

NNA xabariga ko‘ra, Jozef Aun Livan «Hizbulloh»ni qurolsizlantirishga erishish va uning jangovar bo‘linmalarini mintaqa janubidan chiqarish niyatida ekanini ta’kidlagan. Shu bilan birga uning qayd etishicha, ushbu partiya «Livaning bir qismi» hisoblanadi va hukumat inqirozni tinch yo‘l bilan hal etish doirasida u bilan muloqotni davom ettiradi.

Eslatib o‘tamiz, 2024 yil 27 noyabr kuni Livan va Isroil o‘rtasida o‘t ochishni to‘xtatish kelishuviga erishilgan bo‘lib, uning doirasida isroillik harbiylar 60 kun ichida Livan janubidagi egallangan hududlardan chiqib ketishi kerak edi. Ammo Isroil tomoni Livan armiyasi mintaqaga «to‘liq joylashmaganini» ma’lum qilib, hududni tark etish muddatini 18 fevralga qadar uzaytirgan. Mart oxirlarida esa Isroil Livanga kuchli havo hujumlari seriyasini amalga oshirdi. Bunga ushbu mamlakat hududidan Isroilga bir nechta raketa uchirilgani sabab qilib keltirilgan.