Parijda Ruminiya qirollik uyi rahbari qo‘lga olindi

Fransiyada Ruminiya qiroli Karol II ning nabirasi, o‘zini rumin qirollik uyi rahbari deb e’lon qilgan Pavel-Filipp Gogensollern Umumevropa orderi asosida hibsga olindi.

Qayd etilishicha, Pavel-Filipp ko‘chmas mulk bilan bog‘liq firibgarlik, pul yuvish va korrupsiyada ayblanmoqda.

Ruminiya hukumati shahzodaning ekstraditsiya qilinishiga uchinchi marta urinmoqda. 2020 yilda Pavel-Filipp Gogensollern qirollik oilasiga tegishli ko‘chmas mulk bilan bog‘liq firibgarlik va korrupsiya uchun sirtdan qamoqqa hukm qilingan edi. Ammo o‘sha vaqtda Pavel-Filipp Fransiyada bo‘lgan va mamlakat hukumati uni ekstraditsiya qilishdan bosh tortgan.

Shahzoda Gogensollernni vataniga qaytarish yo‘lidagi ikkinchi urinish o‘tgan yili, u Maltaga borganida amalga oshirilgan. Biroq Malta sudi ham inson huquqlari va ayblanuvchining alohida maqomini e’tiborga olib, ekstraditsiyani rad etgan.

Pavel-Filipp Gogensollern o‘ziga nisbatan ta’qibni siyosiy deb hisoblaydi: u 2000 yilda o‘z nomzodini mamlakat prezidentligi lavozimiga ilgari surgan, biroq saylovlarda muvaffaqiyatga erishmagan edi.