Surxondaryoda sudyaga 1000 dollar pora taklif qilgan advokat ushlandi

Surxondaryo viloyatida jinoyat ishi bo‘yicha shikoyatni qanoatlantirib berish evaziga sudyaga pora taklif qilgan advokat qo‘lga olindi. Bu haqda Sudyalar oliy kengashi xabar berdi.

Qayd etilishicha, Surxondaryo viloyat sudi ish yurituvidagi Sh.H.ga (birinchi instansiya sudi tomonidan Jinoyat kodeksining 168-moddasi 4-qismi «a» bandi bilan aybli deb topilgan, hukm apellyatsiya instansiyasida o‘zgarishsiz qoldirilgan) doir jinoyat ishi bo‘yicha berilgan taftish shikoyatini qanoatlantirib berish evaziga sudyaga (jinoyat ishi bo‘yicha ma’ruzachi) 1000 AQSh dollari miqdorida pora taklif qilgan advokat ushlangan.

«Advokat ish bo‘yicha fuqaroviy da’vogarning vakili bo‘lib, taftish shikoyati qonuniy ko‘rib chiqilishi tushuntirilishiga qaramay takror pora taklif qilgani ortidan, sudyaning bildirgisi asosida, vakolatli organ tomonidan tadbir o‘tkazilgan va u daliliy ashyo bilan qo‘lga olindi», — deyiladi xabarda.

Avvalroq Boyovut tumani IIB boshlig‘i o‘rinbosari qo‘zg‘atilgan jinoyat ishi doirasida gumonlanuvchilarga qamoqqa olish tarzidagi ehtiyot chorasi qo‘llamaslikni va’da qilib, bu uchun 10 ming dollar olganida ushlangan edi. Shuningdek, Toshkent shahar FVB boshlig‘i o‘rinbosari tamagirlik yo‘li bilan pora olib kelganlikda gumonlanib qo‘lga olingandi.