Rossiyaga markaziy osiyolik migrantlar oqimi kamaygani aytildi

Markaziy Osiyo davlatlari fuqarolarining Rossiyada ishlash istagi tobora kamaymoqda va shuning uchun ular Xitoy, Janubiy Koreya, Yaqin Sharq va Yevropa kabi mehnat migratsiyasi yo‘nalishlarini tanlashni boshladi. Bu haqda Rossiya hukumati qoshidagi Moliya universiteti professori Aleksandr Safonov ma’lum qildi.

Mutaxassis asosiy sabablarni rubl kursining tushib ketgani, bu Markaziy Osiyo mamlakatlari rezidentlari daromadlariga ta’sir qilgani, shuningdek, migratsiya siyosatining keskinlashuvi deb atagan.

Shu bilan birga, ta’kidlanishicha, respublikalarning o‘zlari faol rivojlanmoqda, Rossiya va Xitoy kompaniyalari o‘z ishlab chiqarishlarini u yerga ko‘chirmoqda, shuning uchun mamlakatda ish o‘rinlari paydo bo‘lmoqda. Hattoki pastroq maosh hisobga olinsa ham, ishchilar o‘z mamlakatida qolish orqali sayohat va ijara haqini tejashi mumkin.

Avvalroq ekspertlar 2025 yilda Rossiyaga O‘zbekiston, Tojikiston va Qirg‘izistondan an’anaviy ishchi kuchi o‘rnini bosa oladigan 35 minggacha hindistonlik ishchi kelishini taxmin qilgan edi. Shuningdek, bozorda Shri-Lanka, Nepal va Bangladeshdan kelgan migrantlar soni ortib borayotgani ta’kidlandi.