Rossiya Kiyevga raketa, Xarkivga dronlar bilan hujum qildi

Ukraina Harbiy-havo kuchlari ma’lumotiga ko‘ra, poytaxt Kiyevga kamida to‘rtta ballistik raketa uchirilgan. Hujum vaqtida shaharning turli hududlarida kuchli portlashlar sodir bo‘lib, bir nechta yong‘inlar kelib chiqqan.

Kiyev shahri meri Vitaliy Klichkoning ma’lum qilishicha, Darnitskiy tumanida raketa bo‘laklari noturar joy hududiga tushib, yong‘in kelib chiqqan. Shuningdek, yana bir manzilda noturar binoga to‘g‘ridan to‘g‘ri zarba berilgan.

Svyatoshinskiy tumanida esa omborxonalar joylashgan hudud nishonga olingani oqibatida yirik yong‘in yuzaga kelgan. Qutqaruv xizmatlari voqea joylarida yong‘inlarni bartaraf etish va vayronalarni tozalash ishlarini olib bormoqda.

So‘nggi ma’lumotlarga ko‘ra, hujum oqibatida ikki kishi halok bo‘lgan, yana olti nafar fuqaro turli darajada jarohat olgan.

Shu bilan bir vaqtda Rossiya qo‘shinlari Xarkiv shahriga ham dronlar orqali hujum qildi. Shahar meri Igor Terexovning bildirishicha, zarbalar Kiyev va Shevchenko tumanlariga to‘g‘ri kelgan.

Shevchenko tumanidagi park hududiga dron kelib tushishi natijasida kinoteatr binosi, avtoturargoh hamda tennis kortlariga zarar yetgan. Shuningdek, mazkur tumanda garaj kooperativi hududi ham nishonga olingan.

Terexovning aytishicha, Nemishlyanskiy tumanidagi turar joylardan biriga ham zarba tekkani haqida dastlabki ma’lumotlar mavjud.

Ayni paytda Xarkivdagi hujumlar oqibatida halok bo‘lganlar yoki jarohatlanganlar haqida rasmiy ma’lumot berilmagan. Har ikki shaharda ham qutqaruv va favqulodda xizmatlar hujum oqibatlarini bartaraf etish ishlarini davom ettirmoqda.