Qozog‘iston superkompyuter yaratishga 40-50 mln dollar sarflaydi

Qozog‘istonga uch oy ichida 64 ta Nvidia superkompyuter klasteri olib kelinadi. Bu haqda raqamli taraqqiyot, innovatsiya va aerokosmik sanoat vitse-vaziri Kanish Tuleushin ma’lum qildi.

Uning so‘zlariga ko‘ra, Qozog‘istonga allaqachon Nvdia chiplarining birinchi partiyasi olib kelingan.

«Ularning narxi qimmat emas, aniq summani ayta olmayman. Ammo quvvati jihatida u qadar kuch emas. Bu birinchi navbatda, olishga ruxsat berilganlaridan, shuning uchun biz kichikroq modellarni unda sinash maqsadida bu imkoniyatdan foydalandik», — deydi vazir o‘rinbosari.

Qayd etilishicha, endi vazirlik nisbatan kuchli superkompyuterlarni yaratish uchun so‘nggi avlod H200 chiplarini xarid qilishni rejalashtirmoqda.

«Yaqin 3-4 oy ichida ular Qozog‘iston hududiga olib kelinib, o‘rnatilishini kutyapmiz. Narxi — 40-50 million dollar atrofida. Bu 64 ta klaster bo‘lgani uchun chiplari soni ko‘p. Ular barcha xavfsizlik talablariga javob beradigan yangi data-markazimiz bazasiga o‘rnatiladi», — deydi Tuleushin.

Eslatib o‘tamiz, o‘tgan yilning noyabrida Turkiya o‘zining birinchi kvant kompyuterini taqdim etgandi. 5 kubitli turk kvant kompyuteri allaqachon optimallashtirish, kriptografiya, molekulyar modellashtirish va sun’iy intellekt kabi sohalarda o‘z potensialini namoyish etib ulgurgan.