«Putin to‘xtaydi» deb o‘ylaydiganlar shunchaki ahmoq – Bayden

BBC nashri bilan suhbatda u Donald Tramp ma’muriyatining Kiyevni hududiy yon bosishga majburlash bo‘yicha urinishlarini 1930 yillarda Britaniya hukumati Adolf Hitlerga nisbatan olib borgan «tinchlantirish» siyosati bilan taqqosladi.

Baydenning ta’kidlashicha, Vladimir Putin butun Ukrainani Rossiyaning bir qismi deb hisoblaydi, shuning uchun ham hududlarni boy berish orqali uni to‘xtataman deb o‘ylagan har bir kishi «shunchaki ahmoqdir».

«Men nega odamlar diktatorga, banditga o‘ziga tegishli bo‘lmagan yerlarni topshirish mumkin va bu uni qoniqtiradi, deb o‘ylashini tushunmayapman», dedi siyosatchi.

Sobiq prezident, shuningdek, AQSh va Yevropa o‘rtasidagi munosabatlar holatidan xavotirda ekanini va bu munosabatlarning buzilishi «dunyo tarixini o‘zgartirishini» aytdi. Bayden Trampning Panama kanali ustidan nazoratni qaytarish, Grenlandiyani qo‘lga kiritish va Kanadani 51-shtat qilish haqidagi chaqiriqlarini qoraladi.

«Nima bo‘lyapti o‘zi? Qaysi prezident buni aytgan? Biz erkinlik, demokratiya, imkoniyat tarafdorimiz, musodara qilish emas», dedi siyosatchi va hozirgi ma’muriyatning harakatlari Amerika qadriyatlarini aks ettirmasligini ta’kidladi.

Donald Tramp aprel oyida TIME jurnaliga bergan intervyusida 2014 yilda anneksiya qilingan Qrim Rossiya tarkibida qolishini aytdi. Amerika ommaviy axborot vositalari Tramp ma’muriyatining mojaroni hal qilish rejasida AQSh Qrimni Rossiyaning bir qismi sifatida tan olishi, shuningdek, Ukrainaning boshqa bosib olingan hududlari ustidan Rossiya nazoratini de-fakto tan olishi borligi haqida bir necha bor xabar bergan.