MRB shtab-kvartirasi yaqinida otishma sodir bo‘ldi

Markaziy razvedka boshqarmasi «xavfsizlikning buzilishi bilan bog‘liq hodisa» yuz berganini tasdiqladi. Voqeaga aloqador bir kishi qo‘lga olingan.

Foto: Getty images

AQSh Markaziy razvedka boshqarmasining Lenglidagi shtab-kvartirasi yaqinida otishma sodir bo‘ldi. Bu haqda NBC News o‘z manbalariga tayanib xabar berdi.

Qayd etilishicha, idora qo‘riqchilari mahalliy vaqt bilan soat 04:00 larda o‘t ochgan. Telekanal ma’lumotlariga ko‘ra, hodisa oqibatida bir ayol yaralangan.

MRB vakillari Reuters agentligiga «xavfsizlikning buzilishi bilan bog‘liq hodisa» yuz berganini tasdiqlagan, biroq otishma to‘g‘risida biror-bir ma’lumot taqdim etmagan. Ta’kidlanishicha, bir kishi qo‘lga olingan, ammo voqeaga oid boshqa tafsilotlar oshkor etilmagan.

MRB shtab-kvartirasi yaqinidagi voqea Vashington markazida Isroil elchixonasining ikki xodimi otib ketilganiga bir sutka o‘tmasdan sodir bo‘lgan. Reutersʼning aniqlik kiritishicha, ushbu ikki hodisa o‘rtasida o‘zaro bog‘liqlik yo‘q.

Tayyorlagan: Фозилбек Юсупов

#AQSh #otishma #MRB