Fransiyada 1 iyuldan bolalar yuradigan joylarda tamaki chekish taqiqlanadi

Fransiyada 1 iyuldan voyaga yetmagan shaxslar yurishi mumkin bo‘lgan ochiq havodagi barcha joyda tamaki chekish taqiqlanadi. Bu haqda mamlakat mehnat, sog‘liqni saqlash, birdamlik va oila vaziri Katrin Votren ma’lum qildi.

Qayd etilishicha, bog‘lar, plyajlar, shuningdek, maktab, avtobus bekati va sport maydonchlari yaqinidagi hududlar ham cheklovga kiritiladi.

Yangi qoidalarni buzganlik uchun jarima 135 yevroga teng. Cheklovlar elektron tamaki chekish, bar va kafelar terrasalarida tarkibida nikotin bor har qanday turdagi mahsulotlarni iste’mol qilishga taalluqli emas.

«Bolalar bor joydan tamaki yo‘qolishi kerak», — deydi vazir. Katrin Votner Immanuel Kantning mashhur iborasini o‘zgartirib, «chekish erkinligi bolalarning toza havodan nafas olish erkinligi boshlanadigan joyda tugashi kerak», dedi.

Bunday taqiq mamlakatning ayrim munitsipalitetlarida allaqachon amalda. Endi u federal darajada kuchga kiradi. 2026 yil o‘rtalarida qadar Katrin Votren elektron tamakilar tarkibidagi nikotin darajasini kamaytirish va ular uchun mo‘ljallangan aromatizatorlarni qisqartirishga erishish niyatida.