Toshkent viloyatida sinov tariqasida sintetik metan ishlab chiqarish yo‘lga qo‘yildi

Toshkent viloyati Angren shahrining Yangiobod mahallasida sintetik metan ishlab chiqarish bo‘yicha yangi loyiha sinov tariqasida ishga tushirildi. Bu haqda viloyat hokimligi matbuot xizmati xabar berdi.

Qayd etilishicha, loyiha «Hududgazta’minot» AJ va Yaponiyaning ITO Corporation kompaniyasi o‘rtasidagi hamkorlik doirasida amalga oshirilmoqda.

Loyiha doirasida mahallaga ITO Corporation tomonidan ishlab chiqilgan zamonaviy texnologiya – propan va havo aralashmasidan sintetik metan gazini oluvchi qurilmalar o‘rnatilgan. Ushbu sintetik metan orqali pilot hududdagi bir nechta ko‘p qavatli uyni gaz bilan ta’minlash tizimi yo‘lga qo‘yilgan.

Ta’kidlanishicha, loyihani yanada kengaytirish, zamonaviy uskunalarni respublika bo‘ylab joriy qilish yuzasidan amaliy ishlar olib borilmoqda.

«Mazkur tashabbus Yaponiya Iqtisodiyot, savdo va sanoat vazirligi ko‘magida amalga oshirilayotgan bo‘lib, O‘zbekistonda energiya samaradorligini oshirish, zamonaviy va ekologik toza texnologiyalarni joriy etishga qaratilgan strategik yo‘nalishlarning ajralmas qismi hisoblanadi», — deyiladi xabarda.