Surxondaryoda Bobotog‘ kanaliga suv chiqaruvchi quvur yorilib ketdi

Surxondaryo viloyati Favqulodda vaziyatlar boshqarmasi Bobotog‘ kanalida sodir bo‘lgan avariya yuzasidan ma’lumot berdi.

Qayd etilishicha, 30 iyun kuni soat taxminan 12:50 larda Jarqo‘rg‘on tumanida Amu Zang kanalidan «Bobotog‘» nasos stansiyasi orqali Bobotog‘ kanaliga suv chiqaruvchi 2840 millimetrli quvurda yorilish yuzaga kelgan.

Sodir bo‘lgan avariyani bartaraf etishga Amu Surxon irrigatsiya tizimlari havza boshqarmasi huzuridagi nasos stansiyalari va energetika boshqarmasi bazasidan 1 ta kran, 1 ta «Kamaz», 2 ta traktor va 12 nafar ishchi xodim jalb qilingan.

Avariya soat 21:00 da bartaraf etilib, 21:20 da nasos stansiyasi ishga tushirilgan.

«Ushbu vaziyat bo‘yicha aholi va aholi yashash xonadonlariga, uy hayvonlariga zarar yetmagan. Tan jarohati olganlar yo‘q», - deyiladi xabarda.