Tramp: Putin AQShning yangi sanksiyalari tahdididan xavotirda

AQSh prezidenti Donald Tramp 4 iyul, juma kuni rossiyalik hamkasbi Vladimir Putin bilan 3 iyul kuni bo‘lib o‘tgan so‘nggi telefon muloqoti chog‘ida Rossiyaning Ukrainaga qarshi urushi sababli AQSh sanksiyalarini kuchaytirishi mumkinligi haqida ogohlantirganini va Putin, uning so‘zlariga ko‘ra, bundan xavotir bildirganini, sanksiyalar joriy etilishi mumkinligini tushunganini aytdi.

Air Force One prezidentlik samolyoti bortida jurnalistlarning savollariga javob berar ekan, Tramp, shuningdek, Putin bilan Ukrainadagi mojaro bo‘yicha muloqotidan juda norozi ekanini aytib, Rossiya «odamlarni o‘ldirishda davom etmoqchi» ekanini ta’kidladi.

«Bu juda qiyin vaziyat. Men sizga avvalroq aytgandim, prezident Putin bilan suhbatimdan juda norozi bo‘ldim. U oxirigacha borishni istayapti, bu yaxshi emas», — dedi Tramp.

Amerika prezidenti, shuningdek, jurnalistlarga bir kun avval Ukraina prezidenti Volodimir Zelenskiy bilan telefonda gaplashgani va Kiyevga Patriot HHM komplekslari uchun raketalarni yuborish imkoniyatini muhokama qilganini aytdi. «Bu ularga mudofaa uchun kerak bo‘ladi... Ularga nimadir kerak bo‘ladi, chunki ular juda qattiq zarba olmoqda», dedi Tramp. U Patriot raketalarining samaradorligini yuqori baholab, qurolni «juda ta’sirli» deb atadi.