Трамп: Путин АҚШнинг янги санкциялари таҳдидидан хавотирда

АҚШ президенти Доналд Трамп 4 июл, жума куни россиялик ҳамкасби Владимир Путин билан 3 июл куни бўлиб ўтган сўнгги телефон мулоқоти чоғида Россиянинг Украинага қарши уруши сабабли АҚШ санкцияларини кучайтириши мумкинлиги ҳақида огоҳлантирганини ва Путин, унинг сўзларига кўра, бундан хавотир билдирганини, санкциялар жорий этилиши мумкинлигини тушунганини айтди.

Air Force One президентлик самолёти бортида журналистларнинг саволларига жавоб берар экан, Трамп, шунингдек, Путин билан Украинадаги можаро бўйича мулоқотидан жуда норози эканини айтиб, Россия «одамларни ўлдиришда давом этмоқчи» эканини таъкидлади.

«Бу жуда қийин вазият. Мен сизга аввалроқ айтгандим, президент Путин билан суҳбатимдан жуда норози бўлдим. У охиригача боришни истаяпти, бу яхши эмас», — деди Трамп.

Америка президенти, шунингдек, журналистларга бир кун аввал Украина президенти Володимир Зеленский билан телефонда гаплашгани ва Киевга Patriot ҲҲМ комплекслари учун ракеталарни юбориш имкониятини муҳокама қилганини айтди. «Бу уларга мудофаа учун керак бўлади... Уларга нимадир керак бўлади, чунки улар жуда қаттиқ зарба олмоқда», деди Трамп. У Patriot ракеталарининг самарадорлигини юқори баҳолаб, қуролни «жуда таъсирли» деб атади.