Italiyada erkak uchishga tayyorlanayotgan samolyot dvigateliga kirib ketdi

Politsiya ta’qibidan qochgan erkak uchish-qo‘nish yo‘lagiga chiqib qolgan. Bu vaqtda harakatlanib kelayotgan samolyotning dvigateli uni o‘z ichiga tortib ketgan.

Foto: Videodan kadr

Italiyaning Bergamo aeroportidagi uchish-qo‘nish yo‘lagida baxtsiz hodisa yuz berdi — erkakni samolyot dvigateli tortib ketdi, deb xabar beradi Corriere della Sera.

Qayd etilishicha, noma’lum erkak politsiya ta’qibidan qochayotgan bo‘lgan. U mashinasini tashlab, aeroportning birinchi qavatidagi kutib oluvchilar zonasiga kirgan va xavfsizlik eshigi orqali uchish-qo‘nish yo‘lagiga chiqib borgan.

«Ma’lumotlarga ko‘ra, erkak yuklar topshiriladigan hududdagi eshikni buzib, uchish-qo‘nish yo‘lagiga yugurgan va parvozga tayyorlanayotgan samolyot yo‘lidan chiqib qolgan», - deyiladi xabarda.

Samolyot dvigatelining aylanayotgan ulkan parraklari bir zumda erkakni o‘z ichiga tortib ketgan va u halok bo‘lgan. Shundan so‘ng samolyot boshqaruvni yo‘qotgan, ammo uchuvchi havo kemasi harakatini o‘z vaqtida to‘xtatishga muvaffaq bo‘lgan.

Ushbu voqeadan keyin aeroport vaqtincha yopilgan, barcha reyslar bekor qilingan.