Италияда эркак учишга тайёрланаётган самолёт двигателига кириб кетди

Полиция таъқибидан қочган эркак учиш-қўниш йўлагига чиқиб қолган. Бу вақтда ҳаракатланиб келаётган самолётнинг двигатели уни ўз ичига тортиб кетган.

Фото: Видеодан кадр

Италиянинг Бергамо аэропортидаги учиш-қўниш йўлагида бахтсиз ҳодиса юз берди — эркакни самолёт двигатели тортиб кетди, деб хабар беради Corriere della Sera.

Қайд этилишича, номаълум эркак полиция таъқибидан қочаётган бўлган. У машинасини ташлаб, аэропортнинг биринчи қаватидаги кутиб олувчилар зонасига кирган ва хавфсизлик эшиги орқали учиш-қўниш йўлагига чиқиб борган.

«Маълумотларга кўра, эркак юклар топшириладиган ҳудуддаги эшикни бузиб, учиш-қўниш йўлагига югурган ва парвозга тайёрланаётган самолёт йўлидан чиқиб қолган», - дейилади хабарда.

Самолёт двигателининг айланаётган улкан парраклари бир зумда эркакни ўз ичига тортиб кетган ва у ҳалок бўлган. Шундан сўнг самолёт бошқарувни йўқотган, аммо учувчи ҳаво кемаси ҳаракатини ўз вақтида тўхтатишга муваффақ бўлган.

Ушбу воқеадан кейин аэропорт вақтинча ёпилган, барча рейслар бекор қилинган.