BMT boshqarmasi G‘azo sektoridan evakuatsiya bo‘yicha chaqiriqni qoraladi

Birlashgan Millatlar Tashkilotining Gumanitar masalalarni muvofiqlashtirish boshqarmasi Isroilning G‘azo aholisi va ichki ko‘chirilganlarni mintaqa markazidagi Dayr al-Balah shahrini tark etib, yopiq qirg‘oq chizig‘i bo‘ylab janubga ko‘chib o‘tishga chaqirishini keskin tanqid qildi. TSAHAL tomonidan chiqarilgan «ommaviy haydab chiqarish buyrug‘i» bu urushdan vayronaga aylangan hududdagi gumanitar sa’y-harakatlarga navbatdagi halokatli zarba bo‘ldi, deya xabar bermoqda dpa 21 iyul, dushanbaga o‘tar kechasi boshqarma bayonotiga tayanib.

Boshqarmaning dastlabki hisob-kitoblariga ko‘ra, «buyruq» berilgan vaqtda hududda 50-80 ming kishi bo‘lgan, ularning ko‘pchiligi chodir lagerlarida joylashgan edi. So‘nggi bir necha soat ichida kamida 1000 oila jangovar harakatlar sodir bo‘lgan hududni tark etishga majbur bo‘ldi, deyiladi bayonotda.

Boshqarma xodimlarining o‘zlari Dayr al-Balahda qolmoqda. Ularning so‘zlariga ko‘ra, yangi jangovar hududga, jumladan, bir nechta gumanitar yordam omborlari, to‘rtta klinika, suv ombori va kanalizatsiya nasos stansiyasi kiradi. «Ushbu infratuzilmaga yetkazilgan har qanday zarar hayot uchun xavfli oqibatlarga olib keladi», — deya ogohlantirdi boshqarma.

Iyul oyi boshida Der Spiegel jurnalida chop etilgan ma’lumotlarga ko‘ra, mamlakat mudofaa vaziri Israel Kats G‘azo sektorining janubiy qismidagi Rafah xarobalarida atigi 60 kun ichida 600 ming falastinlikni sig‘dira oladigan «gumanitar shahar» qurishni buyurgan. Uning fikricha, bu ikkinchi yildan beri insonparvarlik falokatini boshdan kechirayotgan Falastin aholisi ustidan HAMASning kuchini zaiflashtirishi kerak.