London Kiyevni qurollantirish bo‘yicha «50 kunlik kampaniya»ga chaqiradi

Buyuk Britaniya mudofaa vaziri Jon Xili Ukraina mudofaasi bo‘yicha kontakt guruhining «Ramshtayn» formatida bo‘lajak yig‘ilishida uning ishtirokchilarini Kiyevga harbiy yordamni jadal oshirish uchun «50 kunlik kampaniya»ga chaqirish niyatida. Bu haqda 21 iyul, dushanbaga o‘tar kechasi Buyuk Britaniya Mudofaa vazirligi bayonotiga tayanib, The Telegraph nashri xabar berdi. «Ukraina mudofaasi bo‘yicha aloqa guruhi a’zolari sifatida biz Ukrainani jang maydonida qurollantirish va Putinni muzokaralar stoliga o‘tirish uchun «50 kunlik kampaniya»ni o‘tkazishimiz kerak», dedi yig‘ilishga to‘rtinchi marta va nemis hamkasbi Boris Pistorius bilan uchinchi marta raislik qiladigan Xili bayonotda.

The Telegraph nashrining yozishicha, 21 iyul kuni bo‘lib o‘tadigan yig‘ilishda London va Berlin Ukrainaning havo hujumidan mudofaa tizimlari uchun ko‘p sonli raketa sotib olish bo‘yicha qaror qabul qiladi. Britaniya tomoni uchun yetkazib berishlar 2025 yilda Ukraina uchun havo mudofaasi va artilleriya o‘q-dorilari uchun 700 million funt sterling (taxminan 800 million yevro) va Rossiyaga qarshi mudofaa urushini to‘rtinchi yil davom ettirayotgan mamlakatga ko‘proq uchuvchisiz uchoqlarni yetkazib berish uchun boshqa mablag‘ sarflash majburiyatining bir qismidir.

14 iyul kuni AQSh prezidenti Donald Tramp agar yaqin 50 kun ichida Ukrainada tinchlik o‘rnatish bo‘yicha kelishuvga erishilmasa, Qo‘shma Shtatlar Rossiyaning savdo hamkorlariga 100 foizlik ikkilamchi bojlar joriy etishini ma’lum qilgan edi. Bundan tashqari, Tramp Ukrainaga havo hujumidan mudofaa tizimlari, jumladan Patriot tizimlari hamda katta miqdordagi qurol-yarog‘ va boshqa harbiy texnikalarni birgalikda yetkazib berishga va’da berdi.

Bir necha kun avval Tramp «Putindan hafsalasi pir bo‘lganini» tan oldi va bir necha oy oldin u bilan kelishuvga erishishga umid qilgandi. Oq uy rahbarining so‘zlariga ko‘ra, Ukrainadagi tinchlik muzokaralarida, jumladan, u bilan Rossiya prezidenti o‘rtasidagi to‘g‘ridan to‘g‘ri muzokaralarda hamon «doimiy muloqot» hukm surmoqda. «Keyin esa raketalar Kiyevga uchib, odamlarni o‘ldiradi», dedi Tramp.