Gurbanguli Berdimuhamedov aeroportning uchish-qo‘nish yo‘lagini sportkarda sinovdan o‘tkazdi

Sinov jarayonida uning sportkari tezligi 281,4 km/s darajasida qayd etildi.

Foto: Videodan kadr

Turkmaniston Xalq Maslahati raisi Gurbanguli Berdimuhamedov yuqori tezlikda harakatlanuvchi sportkarda Turkmanboshi shahri xalqaro aeroportining uchish-qo‘nish yo‘lagi qoplamasi holatini sinovdan o‘tkazdi.

Ta’kidlanishicha, Turkman xalqining milliy yetakchisi mashinani yuqori tezlikda boshqarib, uchish-qo‘nish yo‘lagini aylanib chiqdi, yuzaning holati va sifatini ko‘zdan kechirdi.

Gurbanguli Berdimuhamedov sinov chog‘ida sportkarning tezligini asta-sekin oshirib, murakkab manyovrlarni bajardi. Videolavhada tezlik 281,4 km/s darajasida qayd etilganini ko‘rish mumkin.

«Gurbanguli Berdimuhamedovning misoli yoshlar, ayniqsa, avtosport bilan shug‘ullanuvchilar uchun namuna hisoblanadi», deyiladi xabarda.

Shuningdek, Xalq Maslahati raisi xizmat safari davomida aeroportga keltirilgan yangi xo‘jalik texnikalari bilan tanishib, ulardan to‘g‘ri foydalanishni ta’minlash bo‘yicha bir qator tavsiyalar berdi.