Pokistonda O‘zbekiston bo‘ylab o‘tuvchi motoralliga start berildi

Tadbir mamlakat elchixonasi va Pokiston turizmni rivojlantirish korporatsiyasi bilan hamkorlikda tashkil etildi.

Tadbir qatnashchilari tomonidan ushbu tashabbus mintaqaviy hamkorlikni rivojlantirish, xalqlar o‘rtasidagi do‘stona aloqalarni mustahkamlash va mamlakatlar sayyohlik salohiyatini keng targ‘ib qilishga qaratilgan muhim qadam sifatida e’tirof etildi.

16 nafar sayohatchidan iborat motoralli ishtirokchilari joriy yilning 1 avgust kuni "Islomobod–Peshovar" yo‘nalishi bo‘ylab yo‘lga chiqdi. Dasturga muvofiq, ralli ishtirokchilari 23 kun davomida Pokiston, Afg‘oniston, O‘zbekiston va Tojikiston orqali o‘tuvchi 5000 kilometrdan ortiq masofani bosib o‘tadi.

Xususan, ular Termiz, Samarqand, Buxoro va Toshkent shaharlarida bo‘lib, o‘zbek xalqining boy madaniyati va mehmondo‘stligi bilan tanishadi.

Shuningdek, motoralli qatnashchilari bo‘lgan sayyohlar O‘zbekistonning boy madaniyati, tarixi va sayyohlik salohiyati haqida turkum videokontentlarni suratga olishni rejalashtirgan.