O‘zbekistonning Lixtenshteyndagi birinchi elchisi tayinlandi

O‘zbekistonning Lixtenshteyn knyazligidagi birinchi elchisi (qarorgohi Berlin shahrida) etib tayinlangan Dilshod Axatov mamlakat valiahd shahzodasi Aloizga ishonch yorliqlarini topshirdi.

Foto: dunyo.info

Xabar qilinishicha, uchrashuvda Lixtenshteyn va O‘zbekiston o‘rtasida 2024 yil mart oyida o‘rnatilgan diplomatik aloqalar hamkorlikni tizimli ravishda davom ettirishga muhim poydevor bo‘lgani, Vadutsning Toshkent bilan munosabatlarni kengaytirish va mustahkamlash tarafdori ekani ta’kidlandi.

Shuningdek, O‘zbekiston delegatsiyasi Lixtenshteyn bosh vaziri o‘rinbosari — tashqi ishlar, atrof-muhit va madaniyat vaziri Sabine Monauni bilan uchrashuv o‘tkazdi.

Suhbat chog‘ida u Xalqaro valuta fondidagi Shveytsariya ovoz berish guruhi doirasidagi samarali hamkorlikni yuqori baholab, Lixtenshteynning 2024 yil oktyabrida mazkur guruhga a’zo bo‘lishi ikki davlat o‘rtasidagi iqtisodiy va moliyaviy sohalardagi hamkorlikni yanada mustahkamlashga xizmat qilishiga ishonch bildirdi.

Dilshod Axatov 2023 yilning sentabrida Germaniyadagi elchi etib tayinlangandi. U O‘zbekistonning Shveytsariya va Chexiyadagi o‘rindoshlik asosida elchisi ham hisoblanadi.

#O‘zbekiston #Lixtenshteyn

Kun.uz yangiliklarini Google News'da kuzating

+ Obuna bo'lish