Mers Putin va Zelenskiy o‘rtasida Jyenevada uchrashuv o‘tkazishni taklif qildi

Germaniya kansleri Fridrix Mersning so‘zlariga ko‘ra, Ukraina va Rossiya prezidentlari Volodimir Zelenskiy va Vladimir Putin o‘rtasidagi to‘g‘ridan to‘g‘ri muzokaralar Jyenevada bo‘lib o‘tishi mumkin. 2 sentabr, seshanba kuni Berlinda Shveytsariya prezidenti Karin Keller-Zutter bilan o‘tkazgan qo‘shma matbuot anjumanida Mers «Jyeneva o‘t ochishni to‘xtatish bo‘yicha kelishuvga erishish uchun mos joy bo‘lardi», dedi.

Germaniya hukumati rahbari 4 sentabr kuni Parijda gibrid formatda bo‘lib o‘tadigan Ukraina bo‘yicha «ko‘ngillilar koalitsiyasi» yig‘ilishi chog‘ida Shveytsariyaning ushbu shahrida bunday sammit o‘tkazish taklifini bildirishini ta’kidladi. Avvalroq Fransiya prezidenti Emmanuel Makron ham Putin va Zelenskiy o‘rtasidagi muzokaralarni Jyenevada o‘tkazish tarafdori ekanini aytgandi.

Keller-Zutter, o‘z navbatida, Shveytsariya hukumati Jyenevada Zelenskiy va Putin o‘rtasidagi ikki tomonlama uchrashuvni tashkil etishga tayyorligini aytdi. Uning so‘zlariga ko‘ra, ko‘plab xalqaro tashkilotlarning ofislari joylashgan shahar tinchlik muzokaralari uchun «ideal». «Bu odamlar hech bo‘lmaganda oldinga bir qadam qo‘yilishi va urushni to‘xtatishi uchun bir-biri bilan gaplashishi juda muhim», deb ta’kidladi Shveytsariya prezidenti. «Lekin, albatta, bu barcha tomonlarning muzokaralar stoliga o‘tirishga tayyorligiga bog‘liq bo‘ladi», — deydi u.