Rossiya Finlandiya bilan chegarada istehkomlar qurishni boshlaydi

Rossiya Xavfsizlik kengashi raisi o‘rinbosari Dmitriy Medvedev Rossiya prezidenti Vladimir Putin topshirig‘iga ko‘ra Finlandiya bilan chegarada istehkomlar qurilishini ma’lum qildi. «Biz hozirgina Finlandiya bilan chegarada bo‘ldik. Agar u yerda harbiy harakatlar bo‘lmasa, demak, har xil devor va to‘siq inshootlari qurilmoqda. Davlat chegarasini qo‘riqlash ishonchliligini oshirish kerak», — dedi Medvedev 5 sentabr, juma kuni Svetogorsk shahridagi Finlandiya-Rossiya chegarasidagi nazorat-o‘tkazish punktiga tashrif buyurganidan keyin.

Xavfsizlik kengashi raisi o‘rinbosarining so‘zlariga ko‘ra, Rossiya chegarasi yaqinida «harbiy faollikning o‘sishi» seziladi. Medvedevning ta’kidlashicha, Finlandiyaning Shimoliy Atlantika alyansiga qo‘shilishi Rossiyaning chegarani tartibga solish va «ehtimoliy nodo‘stona xatti-harakatlarni qaytarish» bo‘yicha harbiy yondashuvlarini o‘zgartirishni oldindan belgilab bergan.

Bundan tashqari, Rossiyaning sobiq prezidenti Ukraina uchun xavfsizlik kafolatlari muhokama qilingan Parijdagi «ko‘ngillilar koalitsiyasi» yig‘ilishiga izoh berdi.

Medvedev sammit chog‘ida qabul qilingan qarorlarni kelajakda hech qanday oqibatlarga olib kelmaydigan «bema’nilik» deb atadi.