O‘zbekiston va Qozog‘iston chegarasida raqamli bojxona nazorati joriy etiladi

O‘zbekiston Bojxona qo‘mitasi raisi birinchi o‘rinbosari G‘ayrat Nosirov hamda Qozog‘iston Davlat daromadlari qo‘mitasi raisi Jandos Duysimbiyev boshchiligidagi delegatsiyalar «G‘ishtko‘prik»–«Jibek jo‘li» chegara nazorat-o‘tkazish punktlarida amalga oshirilayotgan modernizatsiya ishlari bilan tanishdi.

So‘nggi yillarda O‘zbekistonda chegara infratuzilmasini xalqaro standartlar asosida yangilash, o‘tkazuvchanlik qobiliyatini oshirish va raqamli texnologiyalarni keng joriy etishga qaratilgan islohotlar izchil amalga oshirilmoqda. Shu doirada «G‘ishtko‘prik» bojxona posti zamonaviy intellektual bojxona majmuasi sifatida faoliyat yuritishi uchun qayta jihozlandi.

Postda avtomatlashtirilgan nazorat tizimlari, yuqori aniqlikdagi inspeksion-ko‘rik skanerlari, xavflarni boshqarish mexanizmlari hamda ilg‘or axborot-kommunikatsiya texnologiyalari joriy etilgan. Bu esa fuqarolar, transport vositalari va tovarlarni tezkor hamda shaffof tarzda nazorat qilish, rasmiylashtirish jarayonlarini soddalashtirish imkonini beradi.

Shuningdek, Qozog‘iston tomonidagi «Jibek jo‘li» bojxona posti ham zamonaviy muhandislik yechimlari va raqamli boshqaruv texnologiyalari asosida modernizatsiya qilinmoqda.

Uchrashuvda ikki mamlakat bojxona xizmatlari o‘rtasida amaliy hamkorlikni kengaytirish, tovarlar va transport vositalari bo‘yicha elektron ma’lumot almashinuvini rivojlantirish, qo‘shma raqamli yechimlarni joriy etish hamda chegara nazorati samaradorligini oshirish masalalari muhokama qilindi.

Tomonlar amalga oshirilayotgan ishlar tashqi savdo hajmini ko‘paytirish, tranzit tashuvlarini jadallashtirish, logistika yo‘laklarining raqobatbardoshligini oshirish va chegaradan o‘tish tartib-taomillarini yanada soddalashtirishga xizmat qilishini ta’kidladi.