Россия Финландия билан чегарада истеҳкомлар қуришни бошлайди

Россия Хавфсизлик кенгаши раиси ўринбосари Дмитрий Медведев Россия президенти Владимир Путин топшириғига кўра Финландия билан чегарада истеҳкомлар қурилишини маълум қилди. «Биз ҳозиргина Финландия билан чегарада бўлдик. Агар у ерда ҳарбий ҳаракатлар бўлмаса, демак, ҳар хил девор ва тўсиқ иншоотлари қурилмоқда. Давлат чегарасини қўриқлаш ишончлилигини ошириш керак», — деди Медведев 5 сентябр, жума куни Светогорск шаҳридаги Финландия-Россия чегарасидаги назорат-ўтказиш пунктига ташриф буюрганидан кейин.

Хавфсизлик кенгаши раиси ўринбосарининг сўзларига кўра, Россия чегараси яқинида «ҳарбий фаолликнинг ўсиши» сезилади. Медведевнинг таъкидлашича, Финландиянинг Шимолий Атлантика алянсига қўшилиши Россиянинг чегарани тартибга солиш ва «эҳтимолий нодўстона хатти-ҳаракатларни қайтариш» бўйича ҳарбий ёндашувларини ўзгартиришни олдиндан белгилаб берган.

Бундан ташқари, Россиянинг собиқ президенти Украина учун хавфсизлик кафолатлари муҳокама қилинган Париждаги «кўнгиллилар коалицияси» йиғилишига изоҳ берди.

Медведев саммит чоғида қабул қилинган қарорларни келажакда ҳеч қандай оқибатларга олиб келмайдиган «бемаънилик» деб атади.