Tramp YeIga Google uchun jarima tufayli javob choralari bilan tahdid qildi

AQSh prezidenti Donald Tramp Yevrokomissiyaning Amerikaning Google kompaniyasiga nisbatan qo‘ygan 2,95 milliard yevro miqdoridagi jarimasini «adolatsiz» deb atadi va Yevropa Ittifoqiga javob choralari bilan tahdid qildi. «Yevropa Ittifoqi Amerika kompaniyalariga nisbatan bu amaliyotni darhol to‘xtatishi kerak!» - deya u 5 sentabr, juma kuni o‘zining Truth Social ijtimoiy tarmog‘ida yozgan. U Googleʼdan tashqari, Yevropa Ittifoqi tartibga soluvchilari tomonidan bir necha bor jarimaga tortilgan Appleʼni ham eslatib o‘tdi.

Oq uy rahbarining so‘zlariga ko‘ra, Bryussel Amerika kompaniyalariga nisbatan «kamsitish harakatlari» bilan AQShning ish o‘rinlari va sarmoyalariga tahdid solmoqda. Agar jarimalar o‘z kuchida qolsa, Tramp 301-modda bo‘yicha boshqa davlatlarning AQSh uchun salbiy bo‘lgan savdo siyosatiga, jumladan, tariflarga qarshi javob choralarini ko‘rishni nazarda tutuvchi tartibni boshlashga va’da berdi.

Bryussel iddao qilishicha, Google 2014 yildan buyon o‘z xizmatlaridan raqobatchilar zarariga foydalanmoqda, bu Yevropa Ittifoqi faoliyati to‘g‘risidagi shartnomaning 102-moddasini buzish hisoblanadi. Yevropa komissiyasining tekshiruvi shuni ko‘rsatadiki, Google bozorda ustun mavqeni egallab, o‘z mahsulotlariga ustunlik berib kelmoqda.