Chexiya chegarani qo‘riqlash uchun Polshaga uchta vertolyot yubordi

Chexiya Rossiyaning uchuvchisiz uchoqlari Polsha havo hududiga bostirib kirganidan so‘ng o‘zining sharqiy chegarasini qo‘riqlashda yordam berish uchun Polshaga uchta vertolyot yubordi. Bu haqda 14 sentabr, yakshanba oqshomida Chexiya Respublikasi qurolli kuchlari X ijtimoiy tarmog‘ida xabar berdi.

«Bugun Polshaga uchta Chexiya vertolyoti yetib keldi, bu bizning yaqin ittifoqchimiz sharqiy chegarasi havo hududi mudofaasini kuchaytiradi. Ular so‘nggi manzilga yaqin soatlarda yetib boradi. Bizning uchuvchilarimiz yaqin orada Polsha havo hududini himoya qilishni boshlaydi», — deyiladi postda.

O‘z navbatida, Polsha Qurolli kuchlari Bosh shtabi aniqlik kiritishicha, vertolyotlar Nameshti-nad-Oslavudagi 22-vertolyot aviatsiya bazasiga tegishli va ular allaqachon Polshada. «Ushbu bo‘linma askarlari o‘tgan yili Polshaning janubi-g‘arbiy hududlarida sodir bo‘lgan suv toshqini paytida yordam ko‘rsatib, mamlakatda faoliyat olib borgan», — deyiladi o‘sha postda.