AQSh Polshaga Javelin raketalarini 780 mln dollarga sotadi

DSCA bayonotiga ko‘ra, Amerikaning Javelin tankka qarshi raketalarini Polshaga sotish «NATO ittifoqchisi xavfsizligini mustahkamlash»ga qaratilgan. Bitim bo‘yicha yakuniy qaror AQSh Kongressi qabul qilinadi.

Foto: AP

AQSh hukumati Javelin tankka qarshi raketalarini Polshaga 780 million dollarga (662 million yevro) sotishni ma’qulladi. 18 sentabr, payshanba kuni kechqurun Pentagonning harbiy hamkorlik va xorijiy qurol savdosi uchun mas’ul bo‘lgan Mudofaa xavfsizligi bo‘yicha hamkorlik agentligi (DSCA) bu harakat «Yevropadagi siyosiy va iqtisodiy barqarorlik uchun harakatlantiruvchi kuch bo‘lgan NATO ittifoqchisi xavfsizligini mustahkamlash orqali Qo‘shma Shtatlarning tashqi siyosati va milliy xavfsizligini rivojlantiradi» deb e’lon qildi.

AQSh Davlat departamenti allaqachon tegishli hajmda Javelin'ni sotishni ma’qullagan, DSCA esa AQSh Kongressini xabardor qilgan, uning qarori orqali bitim yakuniy tarzda tasdiqlanadi, deb xabar beradi AFP.

Uch yarim yildan ortiq vaqtdan beri Ukrainaga qarshi agressiv urush olib borayotgan Rossiya tahdididan xavotirlanib, Polsha qurolli kuchlarini modernizatsiya qildi va birinchi navbatda AQSh va Janubiy Koreya bilan qurol yetkazib berish bo‘yicha qator shartnomalar imzoladi.