Rossiya «qonunga itoatkor» ishchi kuchiga muhtoj – Putin

Rossiyaga ishchi kuchi kerak, shu bilan birga, mamlakat uning «kerakli» bo‘lishidan va chet eldan kelganlar qonunlarga rioya qilishidan manfaatdor. Bu haqda Rossiya prezidenti Vladimir Putin Dushanba shahrida jurnalistlarga ma’lum qildi.

«Rossiya ishchi kuchiga qiziqish bildirmoqda, ammo u bizning ehtiyojlarimizga mos kelishi muhim. Bundan tashqari, odamlar insoniy sharoitda yashashi va qonun-qoidalarimizga rioya qilishi kerak. Men har doim ular qonunga itoatkor bo‘lishi kerakligini aytaman», dedi u.

Putin, shuningdek, bu sohada muammolar borligini ta’kidladi.

«Muammolar ko‘p va Rossiya fuqarolari ularga ishora qilmoqda. Avvalo, vatandoshlarimiz haqida o‘ylashimiz kerak», deb qo‘shimcha qildi Rossiya prezidenti.

9 oktyabr kuni Imomali Rahmon bilan muzokaralar yakunlari bo‘yicha o‘tkazilgan matbuot anjumanida so‘zga chiqqan Rossiya yetakchisi Rossiyada bir milliondan ortiq Tojikiston fuqarosi yashayotgani va mehnat qilayotganini ta’kidladi.

«Ular turli sohalarda, ayniqsa, qurilish va uy-joy kommunal xo‘jaligi, transport, logistika kabi jadal rivojlanayotgan tarmoqlarda band bo‘lib, Rossiya iqtisodiyotining o‘sishiga salmoqli hissa qo‘shmoqda», dedi Rossiya rahbari.

U Rossiya hukumati Tojikiston fuqarolariga Rossiya hududida munosib mehnat sharoitlarini ta’minlashga intilayotganini ta’kidladi.