Andijonda piyodalar o‘tish joyidan o‘tayotgan bolalarni mashina urib ketdi

Andijon viloyati Andijon tumanida piyodalar yo‘lagidan o‘tayotgan bolalarni mashina urib yubordi. Andijon viloyati YHXB matbuot xizmati ijtimoiy tarmoqlarda tarqalgan yo‘l-transport hodisasi bo‘yicha rasmiy ma’lumot berdi.

Qayd etilishicha, 2025 yil 12 oktyabr kuni soat 14:30 larda, Andijon tumani «Qurama» MFY hududidan o‘tgan A-373 xalqaro ahamiyatga ega avtomobil yo‘lining 343 kilometrida 1969 yilda tug‘ilgan haydovchi S.R. o‘zining Nexia-3 rusumli transport vositasini «Bog‘ishamol – Jalaquduq» yo‘nalishi bo‘ylab boshqarib ketayotib, tartibga solinmagan piyodalar o‘tish joyidan yo‘lning o‘ng tarafidan chap tarafiga kesib o‘tayotgan voyaga yetmagan piyodalar N.Ya va N.I.ni urib yuborib, yo‘l-transport hodisasi sodir etgan.

Ushbu YTH oqibatida N.I. «Chap oyog‘ining yopiq sinishi» jarohati bilan RShTTYoIM Andijon filialiga yotqizilgan. Ikkinchi bolada esa jarohat qayd etilmagan.

Mazkur holat yuzasidan hozirda Andijon tumani IIB tomonidan tergovga qadar tekshiruv harakatlari olib borilmoqda.