Prezident Mirziyoyevning ish haftasi: iqtisodiy yig‘ilish, AQSh delegatsiyasi, YuNeSKO sessiyasi va ikki davlat rahbari tashrifi

Prezident Shavkat Mirziyoyevning yangi ish haftasi muhim uchrashuv va tadbirlarga boy bo‘lishi kutilmoqda. Davlat rahbari joriy yilda iqtisodiyotda kutilayotgan natijalar hamda 2026 yilga mo‘ljallangan asosiy makroiqtisodiy ko‘rsatkichlar yuzasidan kengaytirilgan yig‘ilish o‘tkazadi.

Kunning ikkinchi yarmiga borib, Prezident AQSh prezidentining Janubiy va Markaziy Osiyo bo‘yicha maxsus vakili Serjio Gor boshchiligidagi delegatsiyani qabul qiladi. Suhbatda mintaqaviy hamkorlik, savdo-investitsiya aloqalari, transport-logistika yo‘laklari va fan-texnika sohasidagi qo‘shma tashabbuslar muhokama etiladi.

Ma’lumki, O‘zbekiston tarixiy tadbir — YuNeSKO bosh konferensiyasining 43-sessiyasini qabul qilmoqda. Prezident Samarqandga tashrif buyurib, ilk bor Parijdan tashqarida o‘tayotgan anjuman ochilishida ishtirok etadi, madaniyat, ilm-fan va ta’limdagi xalqaro hamkorlikni mustahkamlashga qaratilgan tashabbuslarni ilgari suradi hamda qator ikki tomonlama uchrashuvlar o‘tkazadi.

Bundan tashqari, joriy haftada mamlakatga Serbiya prezidenti Aleksandr Vuchich va Finlandiya prezidenti Aleksandr Stubb tashrif bilan keladi. Sammitlar doirasida oliy darajadagi muzokaralar bo‘lib o‘tadi va ikki tomonlama hamkorlikni yanada kengaytirishning dolzarb masalalari muhokama qilinadi.

Tadbirlar natijalari haqida qo‘shimcha ma’lumotlar rasman e’lon qilinadi.