Peterburgda migrantlarga kurer bo‘lib ishlash imkoniyati yopildi

3 noyabrdan boshlab Sankt-Peterburgda xorijiy kurerlar uchun «Samokat» va «Yandeks Yeda» yetkazib berish xizmatlariga kirish yopildi. Endi ular smenaga chiqolmaydi va ilovalar orqali buyurtma ololmaydi, deb yozdi «Argumenty i fakty» nashri.

Gap patent bo‘yicha ishlayotgan Ozarboyjon, O‘zbekiston, Tojikiston, Moldova va Ukraina fuqarolari haqida bormoqda. Bu YeOII mamlakatlari fuqarolariga taalluqli emas, ular patensiz ishlashi mumkin.

Avgust oyida Sankt-Peterburg gubernatori Aleksandr Beglov migrantlarning kurerlik xizmatlarida ishlashini taqiqlovchi qarorni imzolagan edi. Shaharda taksilar uchun shunga o‘xshash cheklovlar allaqachon joriy etilgan - kompaniyalarga kadrlar siyosatini o‘zgartirish uchun uch oy vaqt berilgan. Sankt-Peterburg rasmiylari bu chorani yashirin bandlikka qarshi kurash, xizmatlar sifati va xavfsizligini oshirish, rossiyaliklar - yoshlar va talabalar uchun ish o‘rinlari yaratish bilan izohlamoqda.