Aliyev Ozarboyjonga yordam bergan birinchi prezident Mirziyoyev ekanini aytdi

Ozarboyjon prezidenti Ilhom Aliyev Tog‘li Qorabog‘ urushi tugaganidan keyin birinchi bo‘lib yordam taklif qilgan O‘zbekiston prezidenti Shavkat Mirziyoyevning rolini ta’kidladi.

U O‘zbekiston prezidentini Ozarboyjonni qo‘llab-quvvatlagan dunyodagi birinchi davlat rahbari deb atadi.

«O‘zbekiston Qorabog‘ mintaqasini tiklashda yordam ko‘rsatish tashabbusi bilan chiqqan birinchi davlat, prezident Mirziyoyev esa dunyodagi birinchi yetakchi bo‘ldi. Biz buni mamlakatlarimiz va xalqlarimiz o‘rtasidagi birdamlik, do‘stlik, birodarlik qadami sifatida doimo yodda saqlaymiz va qabul qilamiz», dedi Aliyev.

Avvalroq, Ilhom Aliyev «O‘zbekiston – Ozarboyjon uchun qardosh mamlakat, ishonchli ittifoqchi. Bizni mushtarak ildizlar, ma’naviy qadriyatlar, til, etnik yaqinlik, boy tarixiy va madaniy meros birlashtirib turadi», degan edi.