Litva Belarus bilan chegara nazorat-o‘tkazish punktlarini yana ochadi

Belarus bilan chegaradagi nazorat-o‘tkazish punktlari Litvaga kontrabanda yuklangan havo sharlarining kirib kelishi sababli yopilgan edi. Litva hukumati punktlarni qayta ochish to‘g‘risida qaror qabul qilinganini ma’lum qildi, biroq aniq muddatlar hali noma’lum.

Foto: Arnaud Dumontier/MAXPPP/IMAGO

Litva Belarus bilan chegaradagi nazorat-o‘tkazish punktlarini yana ochadi, deb xabar qildi Vilnyusdagi hukumat chorshanba, 19 noyabr kuni. Ilgari Belarus tomonidan Litva hududiga kontrabanda yuklangan havo sharlari uchirib yuborilgani sababli chegaradagi punktlar yopilgan edi. Chegara o‘tkazish punktlari payshanba, 20 noyabrdan boshlab qayta ochiladi.

O‘tgan oy Litva Belarus bilan chegaradagi ikki o‘tkazish punktlari noyabr oxirigacha yopiq qolishini ma’lum qilgan edi. Bu qaror Belarus tomonidan uchirilayotgan va Litva hududiga kirib kelayotgan meteozondlar sababli qabul qilingan — ular havo transporti ishini izdan chiqarib, Vilnyus aeroporti faoliyati to‘xtatilishiga olib kelayotgan edi.

Litva hokimiyatining ta’kidlashicha, sharlarni noqonuniy sigaretalarni chegara orqali o‘tkazayotgan kontrabandachilar uchirmoqda. Vilnyus bu boradagi javobgarlikni Belarus rahbari Aleksandr Lukashenko zimmasiga yuklaydi, chunki u bunday amaliyotlarga chek qo‘ymayapti, deb hisoblanadi. Litva poytaxtida bu holat «gibrid hujum» shakli sifatida ta’riflanmoqda.

Lukashenko esa oldinroq chegarani yopish qarorini «ajabtovur avantyura» deb atagan va g‘arbni Belarus hamda Rossiyaga nisbatan gibrid urush olib borishda ayblagan edi.