Turkiya mamlakat hududiga Rossiya droni qulaganini ma’lum qildi

Rossiyaning «Orlan-10» rusumli uchuvchisiz samolyoti Turkiya shimoli-g‘arbidagi Kojaeli viloyatida qulab tushdi, deb xabar berdi mamlakat ichki ishlar vazirligi.

«Rossiyada ishlab chiqarilgani taxmin qilinayotgan «Orlan-10» turidagi uchuvchisiz uchish apparati topildi, u razvedka va kuzatuv uchun ishlatiladi», deyiladi xabarda.

Dron Izmit okrugidagi Chubuklubala hududidan topilgan. Turk nashrlarining yozishicha, dron qishloq joyiga qulagan, mahalliy aholi uni deyarli shikastlanmagan holda topgan.

Holat yuzasidan IIV tomonidan surishtiruv harakatlari olib borilmoqda.

Hafta boshida, 15 dekabr kuni Turkiya harbiylari Qora dengiz ustida Turkiya havo hududiga qarab uchayotgan noma’lum uchuvchisiz samolyotni urib tushirgan edi. Dronni tutib olish uchun F-16 qiruvchi samolyoti ko‘tarildi. Harbiylar dron boshqaruvni yo‘qotganini aniqladi.