Туркия мамлакат ҳудудига Россия дрони қулаганини маълум қилди

Россиянинг «Орлан-10» русумли учувчисиз самолёти Туркия шимоли-ғарбидаги Кожаэли вилоятида қулаб тушди, деб хабар берди мамлакат ички ишлар вазирлиги.

«Россияда ишлаб чиқарилгани тахмин қилинаётган «Орлан-10» туридаги учувчисиз учиш аппарати топилди, у разведка ва кузатув учун ишлатилади», дейилади хабарда.

Дрон Измит округидаги Чубуклубала ҳудудидан топилган. Турк нашрларининг ёзишича, дрон қишлоқ жойига қулаган, маҳаллий аҳоли уни деярли шикастланмаган ҳолда топган.

Ҳолат юзасидан ИИВ томонидан суриштирув ҳаракатлари олиб борилмоқда.

Ҳафта бошида, 15 декабр куни Туркия ҳарбийлари Қора денгиз устида Туркия ҳаво ҳудудига қараб учаётган номаълум учувчисиз самолётни уриб туширган эди. Дронни тутиб олиш учун F-16 қирувчи самолёти кўтарилди. Ҳарбийлар дрон бошқарувни йўқотганини аниқлади.