Eron prezidenti Oliy rahbarga suiqasd urush e’lon qilishga barobarligini aytdi

Eron prezidenti Mas’ud Pizishkiyon AQSh tomonidan mamlakat oliy rahbari Ali Xominaiyga ehtimoliy suiqasd qilish Eron xalqiga qarshi «keng ko‘lamli urush» bilan barobar bo‘lishidan ogohlantirdi.

«Agar aziz insonlarning hayotida qiyinchiliklar va yo‘qotishlar sodir bo‘lsa, asosiy omillardan biri AQSh hukumati va uning ittifoqchilarining azaliy dushmanligi va g‘ayriinsoniy sanksiyalaridir», deb yozdi Pizishkiyon.

AQSh prezidenti Donald Tramp Erondagi ommaviy norozilik namoyishlari ishtirokchilarini qo‘llab-quvvatladi. 17 yanvar kuni u Eron hukumati mamlakatni boshqarish uchun repressiya va zo‘ravonlikdan foydalanayotganini, oliy rahbarni «kasal odam ekanini» shuning uchun mamlakatga «yangi rahbariyat izlash» vaqti kelganini aytdi.

Eronda norozilik namoyishlari 2025 yil 29 dekabrda riyol kursining keskin pasayishi tufayli boshlandi. Reuters ma’lumotlariga ko‘ra, namoyishlarda halok bo‘lganlar soni 5 ming kishidan oshgan, ular orasida 500 ga yaqin xavfsizlik kuchlari xodimlari ham bor. Donald Tramp bir necha bor namoyishchilar o‘ldirilgan taqdirda Eronga zarba berish bilan tahdid qilgan, biroq 16 yanvar kuni u hujumdan voz kechishga qaror qilganini, chunki rasmiylar namoyish ishtirokchilarini qatl etmaganini ma’lum qilgan. Ali Xominaiy namoyishchilarning o‘limida AQSh prezidentini aybladi.