Эрон президенти Олий раҳбарга суиқасд уруш эълон қилишга баробарлигини айтди

Эрон президенти Масъуд Пизишкиён АҚШ томонидан мамлакат олий раҳбари Али Хоминаийга эҳтимолий суиқасд қилиш Эрон халқига қарши «кенг кўламли уруш» билан баробар бўлишидан огоҳлантирди.

«Агар азиз инсонларнинг ҳаётида қийинчиликлар ва йўқотишлар содир бўлса, асосий омиллардан бири АҚШ ҳукумати ва унинг иттифоқчиларининг азалий душманлиги ва ғайриинсоний санкцияларидир», деб ёзди Пизишкиён.

АҚШ президенти Доналд Трамп Эрондаги оммавий норозилик намойишлари иштирокчиларини қўллаб-қувватлади. 17 январ куни у Эрон ҳукумати мамлакатни бошқариш учун репрессия ва зўравонликдан фойдаланаётганини, олий раҳбарни «касал одам эканини» шунинг учун мамлакатга «янги раҳбарият излаш» вақти келганини айтди.

Эронда норозилик намойишлари 2025 йил 29 декабрда риёл курсининг кескин пасайиши туфайли бошланди. Reuters маълумотларига кўра, намойишларда ҳалок бўлганлар сони 5 минг кишидан ошган, улар орасида 500 га яқин хавфсизлик кучлари ходимлари ҳам бор. Доналд Трамп бир неча бор намойишчилар ўлдирилган тақдирда Эронга зарба бериш билан таҳдид қилган, бироқ 16 январ куни у ҳужумдан воз кечишга қарор қилганини, чунки расмийлар намойиш иштирокчиларини қатл этмаганини маълум қилган. Али Хоминаий намойишчиларнинг ўлимида АҚШ президентини айблади.