AQSh prezidenti Donald Tramp rossiyalik hamkasbi Vladimir Putin bir hafta davomida Kiyevga zarbalar bermay turishga rozi bo‘lganini ma’lum qildi. Payshanba kuni tongda Z-blogerlar Kiyev shahri va Kiyev oblastidagi har qanday obektga hamda butun Ukraina bo‘ylab energetika infratuzilmalariga zarbalar yo‘llashga moratoriy bo‘lishini anons qilishgandi. Juma kuni Kreml bu ma’lumotni tasdiqladi.
«Sovuq tufayli, kuchli sovuq tufayli – ularda ham xuddi bizdagi kabi vaziyat – men shaxsan prezident Putindan bu noodatiy sovuq havoda bir hafta mobaynida Kiyev va boshqa shaharlarni o‘qqa tutmay turishni so‘radim», – degan Tramp Oq uyda o‘z ma’muriyati a’zolari bilan uchrashuvda.
«Va u bunga rozi bo‘ldi. Aytishim kerakki, bu juda yoqimli», – deya qo‘shimcha qilgan AQSh prezidenti.
Shuningdek, Tramp ushbu yig‘ilishda maxsus vakillari Stiv Uitkoff va Jared Kushner «juda qattiq ishlayotgani» evaziga Ukrainadagi urushning yakuni yaqinlashayotganini aytgan.
«Bu Amerika ma’muriyatlari tarixidagi eng omadli yil bo‘ldi <...> Biz sakkizta urushni to‘xtatdik. Va yana biri, bizning fikrimizcha, yakunlanish arafasida. Stiv Uitkoff va Jared [Kushner] juda qattiq ishlayapti. Va o‘ylaymanki, biz urushning yakuniga yaqinlashmoqdamiz», – dedi Amerika prezidenti.
Payshanba kuni ertalab blogosferada ehtimoliy moratoriy mavzusi muhokamasi boshlangandi. Bu haqda ham rossiyalik, ham ukrainalik telegram-kanallarda yozilgandi. Bu mavzuni rossiyalik harbiylashgan blogerlardan birinchi bo‘lib Vladimir Romanov ko‘targan va o‘ziga yetib kelgan xabardan skrinshotni e’lon qilgandi.
U o‘ziga payshanba kuni soat 7:00 dan boshlab «o‘t ochib zarba berishga, ya’ni Kiyev shahri va Kiyev oblastidagi har qanday obektga, shuningdek, butun Ukraina bo‘ylab har qanday infratuzilma obektlariga zarba berishga taqiq qo‘yilgani» haqida «ma’lumot yetib kelgani» haqida yozgan.
Keyinroq Romanov rossiyalik harbiylar 28 yanvardan boshlab keyingi maxsus ko‘rsatmaga qadar butun Ukraina hududi emas, faqat Kiyev shahri va Kiyev oblasti hududlarida energetika infratuzilma obektlariga (elektr nimstansiyalar, issiqlik elektr stansiyalari, gidro elektr stansiyalar, gaz omborlari, neft bazalari va yonilg‘i-moylash materiallari saqlanadigan omborlar) «zarba berishi istisno qilinishi» buyurilgan yana bir xabardan iqtibos keltirdi.
«Cheklov 03.02.2026 sanasiga qadar amal qilishi haqida og‘zaki topshiriq bor», – deya qo‘shimcha qilgan bloger.
