Tramp: AQSh Eronga rejalashtirilgan hujumni ortga surdi

Tramp bu haqda Truth Social ijtimoiy tarmog‘ida yozib, hozirda “jiddiy muzokaralar” olib borilayotganini ta’kidladi. Uning fikricha, muzokaralar natijasida AQSh, Yaqin Sharq davlatlari va boshqa mamlakatlar uchun “maqbul kelishuv”ga erishish mumkin.

Trampning so‘zlariga ko‘ra, ehtimoliy kelishuv Eronning yadroviy qurolga ega bo‘lishini taqiqlashni o‘z ichiga oladi.

Shu bilan birga, u Pentagon rahbari Pit Hegset, Qurolli kuchlar birlashgan qo‘mondonligi raisi Den Keyn va AQSh armiyasiga “agar maqbul kelishuvga erishilmasa, istalgan vaqtda Eronga qarshi keng ko‘lamli hujum boshlashga tayyor turish” bo‘yicha ko‘rsatma berilganini aytdi.

Reuters agentligi qayd etishicha, AQSh 19 may kuni Eronga zarba berishni rejalashtirgani haqida bungacha ochiq ma’lumot bo‘lmagan.

Eron tashqi ishlar vazirligi vakili 18 may kuni Tehronning pozitsiyasi AQShga Pokiston orqali yetkazilganini bildirdi.

Eronning davlatga qarashli Fars agentligi 17 may kuni Vashington Tehronga ikkinchi bosqich muzokaralar uchun qo‘ygani aytilgan besh talabni e’lon qildi.

Fars ma’lumotiga ko‘ra, AQSh 28 fevraldan boshlangan urush davomida Eronga yetkazilgan zarar uchun tovon to‘lashdan bosh tortmoqda, Vashington Erondan 400 kg boyitilgan uranni olib chiqib ketmoqchi, Eronda faqat bitta yadroviy obektlar majmuasi ishlashiga rozi, Tramp ma’muriyati Eronning muzlatilgan aktivlarining hatto 25 foizini ham ochishga tayyor emas, urushni to‘xtatish masalasi muzokaralar jarayoni bilan bevosita bog‘langan.

Eron rasmiylari fikricha, AQSh bu talablar orqali urushda erisha olmagan maqsadlariga diplomatik yo‘l bilan erishmoqchi. Shuningdek, ularning ta’kidlashicha, hatto bu shartlar bajarilgan taqdirda ham AQSh va Isroilning “tajovuz tahdidi” saqlanib qoladi.

Shu munosabat bilan Mehr agentligi muzokaralar “berk ko‘chaga kirib qolgani”ni xabar qildi.

Fars agentligi avvalroq Eron tomoni AQShga qo‘ygan shartlarni ham eslatdi. Ular quyidagilardan iborat: urushni to‘xtatish, jumladan Livandagi harakatlarni ham, Eronga qarshi sanksiyalarni bekor qilish, mamlakatning barcha muzlatilgan aktivlarini ochish, urush oqibatida yetkazilgan zarar uchun kompensatsiya to‘lash, Tehronning Ho‘rmuz bo‘g‘ozi ustidan suverenitetini tan olish.

Ma’lum qilinishicha, aynan Eron birinchi bo‘lib o‘z shartlarini bildirgan, AQShning besh talabidan iborat javob esa shundan keyin taqdim etilgan.

Fars manbasi 12 may kuniyoq Tehron bu shartlar bajarilmas ekan, AQSh bilan muzokaralarga qaytmasligini aytgan edi. Eron hukumati ushbu talablarni “ishonchni tiklash uchun minimal choralar” deb hisoblamoqda.

AQSh va Eron o‘rtasida aprel oyida Pokiston vositachiligida erishilgan sulh kelishuvi muntazam ravishda buzilmoqda.

13 apreldan beri AQSh floti Eron portlarini blokada qilmoqda. Shu bilan birga, Eron dronlari Ho‘rmuz bo‘g‘ozidagi kemalar va Fors ko‘rfazi mamlakatlaridagi obektlarga hujumlar uyushtirmoqda.