O‘zbekiston va Vengriya AESda quruq sovitish texnologiyasi loyihasini muhokama qildi

O‘zbekistonning Vengriyadagi elchixonasida Vengriyaning MVM EGI Zrt kompaniyasi bosh direktori Peter Karpati bilan uchrashuv tashkil etildi. Muloqot davomida O‘zbekistonda qurilayotgan atom elektr stansiyasida quruq sovitish texnologiyasini joriy etish loyihasining amalga oshirish jarayoni va keyingi qadamlar muhokama qilindi.

Foto: iStock

Uchrashuvda loyihaning joriy holati, texnik-tashkiliy masalalar hamda ishlarni muvofiqlashtirishga doir jihatlarga alohida e’tibor qaratildi. Vengriya tomoni ishlar borishi yuqori darajada ekanini ta’kidlab, loyihaning izchil va samarali tarzda ilgari surilayotganini qayd etdi.

Shuningdek, loyihani to‘liq amaliy bosqichga o‘tkazish uchun uch tomonlama bitimni imzolash jarayonini tezlashtirish maqsadga muvofiqligi bildirildi. Tomonlar mazkur hujjatning o‘z vaqtida rasmiylashtirilishi loyihani aniq reja asosida jadallashtirish, vazifalar taqsimotini belgilash hamda keyingi ishlar grafigini muvofiqlashtirishda muhim ekanini ta’kidladi.

Uchrashuv yakunida Peter Karpati MVM guruhi O‘zbekiston bozoriga kirishdan manfaatdor ekanini, mamlakatda yirik va uzoq muddatli strategik hamkor sifatida ishtirok etish imkoniyatlarini ko‘rib chiqayotganini ma’lum qildi. Shu bilan birga, kompaniya O‘zbekistondagi investitsiya loyihalari bo‘yicha takliflarni ko‘rib chiqishga tayyor ekanini bildirdi.