AQShda olmaxon bir uyning kuyib kulga aylanishiga sababchi bo‘ldi

AQShning Florida shtatidagi Panama siti shahrida yashovchi oila olmaxon sababli uysiz qoldi, deb xabar berdi WMBB.

Uy egasi Donni Bantaning aytishicha, tun yarmida u chordoqdan shovqin ovozini eshitgan, keyin esa g‘alati hidni sezgan. Erkak darhol xotini Steysi Devis va farzandlarini uyg‘otgan.

Ular darhol bolalarni hamda iti va mushugini tashqariga olib chiqishgan.

O‘t o‘chiruvchilar tez yetib kelishiga qaramasdan, uy butunlay yonib ketgan. Ma’lum bo‘lishicha, yong‘inga olmaxon sababchi bo‘lgan.

O‘t o‘chiruvchilarning tushuntirishicha, jonivor chordoqda elektr simlarini kemirib tashlagan. Natijada qisqa tutashuv yuz berib, yong‘in kelib chiqqan.