Toshkentda yuz bergan yong‘inda ayol va ikki bola halok bo‘ldi

Shayxontohur tumanida yuz bergan ofatda yana 1 kishi jabrlangani aytilmoqda.

Foto: Videodan kadr

Toshkent shahri, Shayxontohur tumanidagi xonadonlarning birida yuz bergan yong‘in oqibatida 3 kishi halok bo‘ldi, 1 kishi jarohatlandi. Bu haqda «Millar» ko‘rsatuvi ma’lum qildi.

Qayd qilinishicha, yong‘in haqidagi xabar Toshkent shahar Favqulodda vaziyatlar bosh boshqarmasiga 16 fevral kuni soat 20:51 da kelib tushgan. Yong‘in qutqaruv ekipajlari tomonidan soat 21:38 da o‘chirilgan.

Yong‘in o‘chirilganidan so‘ng, uy ichida uch nafar fuqaroning jasadi aniqlangan. Shuningdek, bir nafar fuqaro tez tibbiy yordam xodimlariga topshirilgan.

«Millar» ko‘rsatuvi xabariga ko‘ra, vafot etganlar ona va uning voyaga yetmagan ikki farzandi bo‘lgan.

«Kelinimiz bilan ikkita jiyanimiz xonadan chiqolmay qolibdi. Kira olmadik. Yong‘in sababli qo‘shni tomonidan devorni buzib kirdik oxiri. Kirganimizda kech bo‘lgan ekan», dedi guvohlardan biri.

Holat bo‘yicha tergovga qadar surishtiruv ishlari olib borilmoqda.