Tramp Noemni ichki xavfsizlik vaziri lavozimidan bo‘shatdi

Donald Tramp ma’muriyatida qat’iy immigratsiya siyosatiga rahbarlik qilib kelgan Kristi Noem mart oyi oxirida AQSh ichki xavfsizlik vaziri lavozimini tark etadi. Uning o‘rniga AQSh prezidenti Donald Tramp respublikachi va Kongress Senati a’zosi Markueyn Mallinni tayinlashni taklif qildi. Bu haqda Tramp 5 mart, payshanba kuni o‘zining Truth Social ijtimoiy tarmog‘ida ma’lum qildi.

Kristi Noemni ishdan bo‘shatish tashabbusini Vakillar palatasidagi demokratlar ko‘targan, ularning talablariga bir necha respublikachilar ham qo‘shilgan. Migrantlarga nisbatan keskin ommaviy tanqidi bilan tanilgan Noemning iste’fosi Minneapolisda AQShning ikki fuqarosi — Rene Gud va Aleks Pretti migratsiya xizmatlari xodimlari tomonidan o‘ldirilishi atrofidagi mojaro tufayli yuz berdi. Vazir ularni «ichki terroristlar» deb atagan va Gud hamda Prettining halok bo‘lish holatlari aniqlanganidan keyin ham bu so‘zlari uchun uzr so‘rashdan bosh tortgan.

Qo‘shimcha sabab sifatida qiymati 220 million dollar bo‘lgan reklama kampaniyasi ham ko‘rsatildi. Unda Kristi Noem Rashmor tog‘i fonida ot ustida suratga tushgan. Kongressdagi eshituvlarda u bu kampaniya budjeti shaxsan Donald Tramp tomonidan ma’qullanganini aytgan, ammo Tramp Reuters agentligi bilan suhbatda Noemning bu so‘zlarini rad etgan.

Truth Social’dagi postida Donald Tramp Kristi Noemga ishidagi «ta’sirli natijalari» uchun minnatdorlik bildirdi va u AQSh ma’muriyatida G‘arbiy yarimsharda xavfsizlikni ta’minlash bilan shug‘ullanadigan yangi tuzilmaga rahbarlik qilishini aytdi.

Noemning vorisi Markueyn Mallin, uni hali AQSh Senati tasdiqlashi kerak, Trampning qat’iy immigratsiya siyosatini qo‘llab-quvvatlovchilardan biri hisoblanadi. Mallin o‘n yilni Vakillar palatasida o‘tkazgan, 2023 yilda esa Senatga o‘tgan. U chegara xavfsizligi va AQShda yashash uchun ruxsatnomasi bo‘lmagan migrantlar jinoyatchiligiga qarshi kurashga e’tibor qaratadi. Shu bilan birga, Reuters qayd etishicha, immigratsiya siyosatining haqiqiy me’mori Tramp ma’muriyati rahbari o‘rinbosari Stiven Miller bo‘lib qolmoqda.