Oxirgi o‘n yilliklarda Markaziy Osiyo muzliklar hajmining 30 foizigacha qismini yo‘qotdi va bu jarayon tezlashyapti – Aziz Abduhakimov

Bugungi kunda Markaziy Osiyo iqlim o‘zgarishiga eng zaif hududlar qatoriga kiradi. Jahon meteorologiya tashkilotining 2020 yil mart oyidagi hisobotiga ko‘ra, mintaqada isish sur’atlari global o‘rtacha ko‘rsatkichdan ikki baravar yuqori hisoblanadi. Ostona shahrida bo‘lib o‘tayotgan Mintaqaviy ekologik sammit doirasida chiqish qilgan O‘zbekiston Ekologiya va iqlim o‘zgarishi milliy qo‘mitasi raisi Aziz Abduhakimov tog‘li hududlardagi ekologik vaziyatni barqarorlashtirish borasida qator takliflarni ilgari surdi, deya xabar berdi Kun.uz muxbiri. 

«Markaziy Osiyodagi tog‘ ekotizimlari suv, oziq-ovqat va ekologik xavfsizlikni ta’minlovchi asosiy omillardan biridir. Xususan, mintaqa suv resurslarining 80 foizigacha bo‘lgan qismi aynan tog‘larda shakllanadi va bu bevosita mamlakatlarimizning barqaror rivojlanishiga ta’sir ko‘rsatadi. Shu bilan birga, xavotirli tendensiyalar kuzatilmoqda. So‘nggi o‘n yilliklarda mintaqa muzliklar hajmining 30 foizigacha qismini yo‘qotdi va bu jarayon tezlashishda davom etyapti. O‘zbekiston mintaqaviy hamkorlikni kuchaytirish va faol choralarni boshlash tarafdori. Biz transchegaraviy moslashuv dasturlarini amalga oshirishni, tog‘ kun tartibini milliy iqlim majburiyatlari va moslashuv rejalariga integratsiya qilishni qo‘llab-quvvatlaymiz», dedi Aziz Abduhakimov.

Ekoqo‘mita raisi tog‘ o‘rmonlari va yaylovlarini tiklash, suv yig‘ish hududlarini himoya qilish hamda ekotizimlarni barqaror boshqarishga alohida ahamiyat qaratilishini ta’kidlab o‘tdi.

«Shu o‘rinda tog‘ hududlarini o‘rganish bo‘yicha ilmiy dasturlarni ishlab chiqish va amalga oshirishni taklif etamiz. Bu aholining ekologik savodxonligini oshirish uchun tog‘ bioxilma-xilligi holati haqida dolzarb ma’lumotlar berishga xizmat qiladi. Bunday yondashuv bioxilma-xillik uchun muhim hududlarda inson va yovvoyi tabiat o‘rtasidagi mojarolarning oldini olishga ham yordam berishi mumkin», dedi u.

Abduhakimovga ko‘ra, Markaziy Osiyo mamlakatlarining iqlim o‘zgarishiga moslashishi uchun milliardlab dollar pul kerak, ammo amaldagi moliyalashtirish darajasi juda cheklanganligicha qolyapti. Shu jihatdan, xalqaro tashkilotlardan mablag‘ jalb qilishni kengaytirish kerak.